Tuesday, 7 May 2013

बांगलादेश, पाकिस्तानातून वॉल्ट डिस्ने गाशा गुंडाळणार

कंपनीतील कामगारांच्या सुरक्षेचे कारण देऊन वॉल्ट डिस्ने कंपनीने बांगलादेश, पाकिस्तान आणि अन्य तीन देशांमधून पुढील एप्रिल महिन्यापर्यंत आपला गाशा गुंडाळण्याचा निर्णय घेतला आहे.
या निर्णयामुळे बांगलादेश आणि पाकिस्तानातील कापड निर्यात व्यवसायावर विपरीत परिणाम होण्याची शक्यता वर्तविण्यात येत आहे. युकॅडोर, व्हेनेझुएला आणि बेलारूसमधील उत्पादनही बंद करण्यात येणार आहे, असे डिस्ने ग्राहक उत्पादन कंपनीचे अध्यक्ष बॉब चॅपेक यांनी सांगितले.
जागतिक बँकेने दिलेल्या अहवालावर आधारित आमचा निर्णय आहे. विश्वासार्हता, भ्रष्टाचार, हिंसाचार याचे प्रमाण किती आहे आणि देशाचा कारभार कसा आहे, याबाबत पाहणी करून त्यावर अहवाल सादर करण्यात आला होता. या निकषांवर सदर पाच देश अत्यंत खालच्या स्तरावर आहेत, असेही ते म्हणाले.

एड्सपेक्षाही घातक महाजिवाणू सापडला

एड्सपेक्षाही जास्त भयानक असलेला लैंगिक संबंधातून पसरणारा नवीन जिवाणू सापडला आहे. वैज्ञानिकांच्या मते तो एड्सपेक्षाही घातक ठरणार आहे. प्रतिजैविकांना दाद न देणारा हा 'गणोरिया' रोगास कारण ठरणारा जिवाणू असून तो जपानमध्ये दोन वर्षांपूर्वी आढळून आला आहे. या जीवाणूचे परिणाम हे एड्स विषाणूमुळे होणाऱ्या परिणामांशी मिळतेजुळते आहेत.
या जिवाणूापासून झालेल्या गणोरियामुळे सेप्टिक होते व प्रसंगी मृत्यू ओढवतो, असा इशारा नॅशनल कोअ‍ॅलिशन ऑफ एसटीडी डिसीजेस या संस्थेचे संचालक विल्यम स्मिथ यांनी दिला आहे. गणोरियाच्या या जीवाणूचे नाव 'एचओ ४१' असून तो दोन वर्षांपूर्वी जपानमधील एका लैंगिक सेविकेत आढळला आहे. सध्याच्या प्रतिजैविकांना हा जीवाणू दाद देत नाही. आतापर्यंत एमआरएसए व सीआरइ हे दोन महाजीवाणू प्रवर्गात आहेत त्यात आता या जिवाणूची भर पडली आहे. ज्यांना या जिवाणूची लागण होते त्यातील निम्मे प्राणास मुकतात व त्याची लागणही वेगाने होते.
नॅचरोपॅथिक मेडिसिनचे डॉक्टर अ‍ॅलन ख्रिसितयनसन यांनी सांगितले की, हा जिवाणू फारच आक्रमक असून तो जास्तीत जास्त लोकांवर घातक परिणाम करतो. सीएनबीसी न्यूजने म्हटले आहे की, एड्सने जगात ३ कोटी लोक मृत्युमुखी पडले असून गणोरियाच्या जीवाणूने मरण पावणाऱ्यांची संख्या नजीकच्या काळात अधिक असू शकते.

सौदी शाळांत मुलींना खेळाधिकार!

सौदी अरेबियात खासगी शाळांमध्ये मुलींना खेळ खेळण्याचा अधिकार अखेर मिळाला आहे. महिलांवरील र्निबध संपवण्यासाठी हा निर्णय घेण्यात आल्याचे त्या देशाच्या शिक्षण मंत्रालयाने म्हटले आहे. सौदी वृत्तपत्रांनी याबाबत सरकारने केलेल्या सुधारित नियमांची माहिती दिली आहे. असे असले तरी या देशात जास्त मुली या सरकारी शाळांत शिकत असल्याने त्यांना मात्र या अधिकारापासून वंचित ठेवण्यात आले आहे. 
झाले काय?
२०१२ च्या लंडन ऑलिम्पिकच्या वेळी सौदी महिलांच्या क्रीडा सहभागाचा प्रश्न ऐरणीवर आला होता. त्यानंतर सौदी अरेबियाने महिला अ‍ॅथलीट्सना प्रथमच ऑलिम्पिकला पाठवले होते. 'ह्य़ूमन राइट्स वॉच'ने तेव्हा असे म्हटले होते, की दोन सौदी महिलांनी ऑलिम्पिकमध्ये सहभाग घेतला असला, तरी या आखाती देशात महिलांनी खेळात सहभागी होण्यावर बंदी आहे. सौदी महिलांवर गाडी चालवण्यापासून बंदी होती, तेथे चेहऱ्यापासून पायाच्या अंगठय़ापर्यंत अंग झाकणारे पोशाख महिलांना परिधान करावे लागतात.
बंधने काय?
खासगी शाळेतील मुलींना खेळण्याची परवानगी असली तरी त्यांनी पूर्ण व व्यवस्थित कपडे घालणे अपेक्षित आहे.मुलींसाठी महिला क्रीडा प्रशिक्षक ठेवणे गरजेचे आहे. या अगोदरही खासगी शाळांमध्ये तुरळक प्रमाणात शारीरिक शिक्षण दिले जात होते पण नियम पाळले जात नव्हते.

REPORT "स्टेट ऑफ वर्ल्ड मदर २०१३"

अमेरिकेतील सेव्ह द चिल्ड्रन या स्वयंसेवी संस्थेने नुकतेच स्टेट ऑफ वर्ल्ड मदर २०१३ (जगभरातील मातांची स्थिती) हा अहवाल सादर केला आहे. जगभरात लहान मुलांचे मृत्यू दर घटवण्यात यश येत असताना विविध कारणांमुळे पहिल्याच दिवशी मृत्यू पावणा-या कोवळ्या जीवांची संख्याही कमी नाही. या मुद्द्यावरुन अमेरिकास्थित या स्वयंसेवी संस्थेने जगभरातील १७६ देशांचा अभ्यास केला. यात माता आणि पाल्याचे स्वास्थ, त्यासाठीच्या सुविधा, सामाजिक दृष्टीकोन अशा विविध पैलुंचा या अहवालात अभ्यास केला गेला. याआधारे संस्थेने सर्वोत्कृष्ट आणि सुमार देश अशी यादीच जाहीर केली आहे. फिनलँड, स्वीडन,नॉर्वे या देशांना माता आणि पाल्यांना सर्वोत्कृष्ट सेवा देण्याचा मान मिळाला तर डेमोक्रेटीक रिपब्लीक ऑफ काँगो, सोमालीया आणि सियेरा लिओन या देशांचा सर्वात खालचा क्रमांक मिळाला. 

विशेष म्हणजे यात भारताने पाकिस्तान आणि बांग्लादेश, चीन या शेजारी राष्ट्रांनीही पिछाडीवर टाकले आहे. अपुरे वजन, प्रीटर्म बर्थ, अस्वच्छता, मातृआरोग्याकडे होणारे दुर्लक्ष याकारणांमुळे भारतातील मृत्यूचे प्रमाण वाढल्याचा निष्कर्षही या अहवालात काढण्यात आला आहे. जगातील अन्य राष्ट्रांच्या तुलनेत भारतात दरवर्षी तब्बल तीन लाख मुलांचा पहिल्याच दिवशी मृत्यू होत असल्याची धक्कादायक माहिती "स्टेट ऑफ वर्ल्ड मदर २०१३" या पाहणी अहवालातून समोर आली आहे.

पाकिस्तान आणि बांग्लादेशमध्ये दरवर्षी अनुक्रमे ६० आणि २८ हजार नवजात शिशूंचा पहिल्याच दिवशी मृत्यू होत असतानाच भारतात हे प्रमाण तर तब्बल तीन लाख नऊ हजार असल्याचे म्हटले आहे. म्हणजेच जगातील एकूण मृत्यूपैकी २९ टक्के मृत्यू केवळ भारतात होतात. मातांच्या बाबतीतही भारताची परिस्थिती दयनीय असल्याचे आकडेवारी सांगते. दक्षिण आशीयात दरवर्षी ८३ हजार महिलांचा प्रसुतीदरम्यान किंवा गर्भवती असताना मृत्यू होता. यात भारतातील ५६ हजार महिलांचा समावेश असुन पाकिस्तानमध्ये हेच प्रमाण १२ हजार आहे. भारतातील २८ टक्के मुलांचे वजन गरजेपेक्षा कमी असल्याचा दावा या संस्थेने केलाय.

भारतासारख्या विकसनशील देशासह अमेरिकेसारख्या प्रगत देशाची बिकट स्थिती या अहवालातून समोर येते. युरोपीयन देशांमध्ये नवजात शिशूंचे पहिल्या दिवशी मृत्यूचे प्रमाण साडेपाच हजार असतानाच अमेरिकेत मात्र हे प्रमाण थेट ११ हजार ३०० आहे. या समस्यांवर तोडगा काढण्यासाठी सर्व देशांनी अधिकाधिक वैद्यकिय सेवा देणे, ड़ॉक्टर, परिचारिका, जनजागृतीसाठी सामाजिक कार्यकर्त्यांची फौज उभारण्याची कामे हाती घेण्यासह सर्वप्रथम स्त्री-पुरुष समानतेसाठी पुढाकार घेण्याची गरज असल्याचे म्हटले असून कमी वयात मुलींची लग्न झाल्याने त्या मातृत्वासाठी सक्षम नव्हत्या असे निरीक्षणही संस्थेने नोंदवले आहे.

शिवरामकृष्णन यांची आयसीसीच्या समितीवर वर्णी

माजी फिरकीपटू लक्ष्मण शिवरामकृष्णन यांची आंतरराष्ट्रीय क्रिकेट परिषदेच्या (आयसीसी) क्रिकेट समितीत वर्णी लागली आहे. या समितीत माजी कर्णधार अनिल कुंबळे अध्यक्षांची भूमिका पार पाडणार आहे. 
शिवरामकृष्णन हे टीम मे यांची जागा घेतील. याव्यतिरिक्त श्रीलंकेचा कुमार संगकारा हा २00७पासून या समितीचा सदस्य आहे. १0 कसोटी कर्णधारांच्या मतांनुसार संगकारा आणि शिवरामकृष्णन यांची नियुक्ती करण्यात आली आहे. हे दोन्ही खेळाडू ३ वर्षांपर्यंत म्हणजेच २0१३ ते २0१५पर्यंत आयसीसी क्रिकेट समितीचे सदस्य राहतील.